ИИМ кыргызстандыктарды чагымчыл билдирүүлөрдү таратпоого чакырат

Ички иштер министрлиги жарандардан мессенджерлерде жана социалдык тармактарда чагымчыл, атайылап жалган билдирүүлөрдү таратуудан алыс болууну өтүнөт. Бул тууралуу министрликтин маалымат кызматы билдирди.

Буга чейин социалдык тармактарда Кыргызстандагы президенттикке талапкер деп болжолдонгон эки адамдын сүйлөшүүсүнүн аудио жазуусу тарай баштаган. Атап айтканда, алар 2021-жылы революция уюштуруу жана 10-январдан кийин массалык нааразычылык акцияларын өткөрүү маселелерин талкуулашкан. Милиция маалыматтын булагын аныктап жатат.

«Айрым жарандар мессенджерлерде жана социалдык тармактарда жалган билдирүүлөрдү таркатып жатканын билебиз, алардын мазмуну кырдаалды туруксуздаштырууга багытталган. Ички иштер министрлиги кыргызстандыктарга чагымчылдыкка алдырбоо өтүнүчү менен кайрылып, аларды мындай билдирүүлөрдү таратуудан алыс болууга чакырат. Мындан тышкары, аларды ички иштер органдарына билдирип коюуну суранабыз», — деп айтылат министрликтин билдирүүсүндө. Мындан тышкары, Ички иштер министрлиги кырдаалды дестабилдештирүү максатында чагымчыл жана башка материалдарды таратуу кылмыш жоопкерчилигине кирерин эске салды.